Wanakijiji waajiri watoto waliomaliza sekondari kufundisha shule ya msingi.

Waziri wa Elimu na Mafunzo ya Ufundi, Dk. Shukuru Kawambwa.
wameamua kuwaajiri watoto wao waliomaliza kidato cha nne kufundisha Shule ya Msingi Visezi, ili kutatua tatizo la upungufu wa walimu shuleni hapo.

 

Wananchi  hao wamesema wanawalipa watoto hao Sh. 15, 000 kwa wiki kama posho ya kujikimu.

 

Walisema wameamua kuajiri watoto wao baada ya kuona hakuna juhudi zozote zinazofanywa na serikali kutatua tatizo hilo.

 

Wakitoa kero zao mbele ya Mbunge wa Bagamoyo, ambaye pia ni Waziri wa Elimu na Mafunzo ya Ufundi, Dk. Shukuru Kawambwa, Mwenyekiti wa kijiji hicho Hamisi Kiatala, alisema katika kipindi cha zaidi ya miaka kumi kero ya upungufu wa walimu katika shule hiyo ya Visezi haijawahi kutatuliwa na kwamba ina walimu watano wa kiume na mahitaji ya walimu  ni 11.  

 

Kitala alisema serikali ya kijiji kwa kushirikiana na wanakijiji walifikia hatua hiyo ya kuwaajiri watoto wao wapatao saba, baada ya kuona hakuna jitihada zozote zinazofanywa na serikali za kuletewa walimu.  Alisema anashangaa kuona hakuna uwiano wa walimu kati ya kijiji hicho na vijiji vya jirani na kufafanua kuwa Shule ya msingi Vigwaza ina walimu 30  na Ruvu Darajani ina walimu 27.

 

Alisema mbali ya kero hiyo, wananchi wa kijiji hicho wanakabiliwa na ukosefu wa maji ambayo si ya uhakika na katika vitongoji vitatu vya Changedere, Kisogo na Chauru hawana huduma ya maji kabisa na hununua ndoo moja Sh.700/=  katika vijiji vya jirani.

 

Mkazi  mwingine wa kijiji hicho Mashauri Tengeneza alimtaka mbunge huyo kutatua kero hizo haraka na kumtishia kuwa asipotatua kabla ya mwezi Oktoba  CCM haitaweza kushinda kwani haijawafanyia kitu kwa kipindi cha miaka kumi.

 

“Ngoja tukwambie, sisi wanavisezi wote ni wanaCCM kwa hiyo usiwe na wasiwasi lakini kama hutatatua hizi kero zetu CCM itashinda kwa shida sana, sio siri,” alisema.

 

Akijibu kero hizo, Kawambwa aliwataka wananchi hao kuwa na subira na kuwa zile kero zinazowezekana  atashughulikia kwa kushirikiana na viongozi wa kijiji kabla ya mwezi Oktoba mwaka huu.

 

“Kero ya walimu itakwisha hivi karibuni kwani TAMISEMI wana mpango wa kuwaajiri walimu, lakini viongozi wa kijiji hamjawahi kuniambia hizi kero zenu wakati mimi ni mbunge wenu pia ndio waziri mwenye dhamana. 

 

Ndugu wananchi  hizi kero zinazowezekana kutatua nitazitatua kwa kushirikiana na viongozi wa kijiji, zitakazoshindikana tutazishughulikia mwakani kama nitarudi tena”, alisema.